บันทึกเรื่องราว ๑๙ มกราคม ๒๕๕๓

สังขารา ล่วงมาแถมแล้ว เติงปี๋ใหม่แก้ว ผ่องแผ้วสีใส
ดอกเอื้องจี๋หน้อย ดอกสร้อยหอมไกล๋ สะบันงายาย ลามปล๋ายช่อตั้ง
ดอกเข็มจี๋ขาว ดอกกว๋าวจี๋สั้น มะลิรอมปัน หอมล้ำ
หมู่เฮาจาวเหนือ ได้เมือแถมนั้น ปิ๊กฮอดบ้าน ล้านนา

ไห้วสาพ่อเจ้า แม่เจ้ามาต๋า ปู่ย่าอาวอา วัดวาข่วงแก้ว
ย้อนเป๋นวันดี สีใสผ่องแผ้ว สืบฮีตตวยแนว ก่อนกี๊
สิบนิ้วไหว้สา เจ้าต๋าแลชี้ ผดาอยู่หนี้ คนฟัง
ต๋างแตนดอกฟ้า มาลาบุปผัง เป๋นวัจนัง วาทังค่าวสร้อย

ขออู้ขอจ๋า เจ้าต๋าแลห้อย ม่วนเหล้นเริงปอย ก่อนนั้น
“กำปอนปี๋ใหม่” เจ้าไหมแพรชั้น เปิ้นปั๋นก่อนอั้น นานมา
จ่วยกั๋นปั๋นเต๊อะ ป่าเลอะไหว้สา ฮื้อสมฉายา ล้านนาเวียงแก้ว
ขอเชิญหมู่เฮา นายเลาผ่องแผ้ว ปั๋นปอนเป๋นแนว ต่อชั้น
บ่าว่ากะโลง หยาดโยงค่าวนั้น เป๋นกล๋อนว่าอั้น กำดี

ปั๋นใจโจคช้าง เป่งว๊างใสสี ฮื้อได้อยู่ดี ฤทธีใฝ่เฝ้า
อยู่ม่วนกิ๋นหวาน หมั่นตานพระเจ้า ก๊าขายฟายเอา สิ่งทรัพย์
ปี๋ใหม่มาเถิง ฮอดเติงที่ทัด ขอฮื้อสิ่งทรัพย์ มั่งมูล
ปี๋เก่าล่วงแล้ว ฮื้อแคล้วหายสูญ เป๋นเคราะห์อาดูล หายสูญห่างเจ้า
กึ๊ดหยังอันใด สมใจ๋ใฝ่เฝ้า ดั่งใจ๋ละเมา นั้นเล้า

ก๊าแม่นขายหมาน กิ๋นตานค่ำเช้า มั่งมูลของข้าว แพรวา
อันที่รวยแล้ว บ่แคล้วกำจ๋า สมบัตินานา งอกเงยไปหน้า
หมู่บ่าวหมู่สาว เจ้ากว๋าวดอกอ้า ฮื้อจื่นอุรา ค่ำเช้า
กิ๋นเหล้ากิ๋นยา รถรานั้นเล้า จะไปไคว่เข้า ขี่ไป

มะลิบานแล้ว ดอกแก้วหอมไกล๋ จักขอลาไป ก่อนแลนายเหย
ปี๋ใหม่เมืองฮอดแล้ว นายเฮย
ฮื้อสุขสมดั่งเกย เนอเจ้า
ฮื้ออยู่ม่วนจื่นเจย ค่ำเช้า เพลา ขอปั๋นปอนหมู่เจ้า จุ๊ผู้ นายคน

ประกาศปี๋ใหม่ เมือง ๒๕๕๓
ปี๋กดยี จุลศักราช ๑๓๗๒

วันที่ ๑๔ เมษายน พ.ศ. ๒๕๕๓ วันสังขานต์ล่อง
วันที่ ๑๕ เมษายน พ.ศ. ๒๕๕๓ วันเน่า-วันเสีย
วันที่ ๑๖ เมษายน พ.ศ. ๒๕๕๓ วันพญาวัน

เถลิงศก เวลา ๑๑ นาฬิกา ๑๘ นาที ๓๖ วินาที วันศุกร์ ธาตุน้ำ
ปีนี้ ราศีอยู่ที่ปาก กาลกีณีอยู่ที่จมูก จังไรอยู่ที่หลัง
สระเกล้าดำ หัว หันหัวไปทางทิศไต้
ปีนี้เมืองเหนือล้านนาถือว่าเป็นทิศมหามงคลไชย

มังคลวุฒิสิริศุภมัสตุ จุลศักราชได้ ๑๓๗๑ ตัว ปีฉลูฉนำ กัมโพธพิสัย
เข้ามาในคิมหันตอุตุ วิสาขมาส ชุณหปักษ์ เอกมี วุธวารไถง
ไทยล้านนาภาษาว่า ปีกีดเป้า เดือน ๘ ขึ้น ๑ ค่ำ
พร่ำว่าได้วันพุธ ไทวัน กาบสง้า ตรงกับวันที่ ๑๔ เมษายน พ.ศ. ๒๕๕๒๓

ยามนั้นรวิสังขานต์มีต๋น เรื่อเรืองงามประดุจดั่งคำสิงคี สถิตย์อยู่ทิพยวิมานมีนราศีประเทศ
ก็ประดับต๋นด้วยเครื่องอาภรณ์วิเศษอลังการสีดั่งแก้วมหานิลผ่องแผ้ว คือว่าสีดำอมเขียวเลิศแล้ว
ประดับต๋นด้วยรัตนมณีแก้วอินทนิล ต่างขะจ๋อนหู และสุขขะโจ๋มหัวก็ดำมีวรรณะอันเรืองรุ่ง
รัศมีพุ่งงามต๋า มีหัตถามือซ้ายถือดอกไม้อันงามโสภา มีมือเบื้องขวานั้นก็มาถือดาบสะหลีกั๋ญไจ
ลุกยืนสุบเกิบ (รองเท้า) ย่างไป ได้กาละยามดี ยามนั้นก็เสด็จขึ้นนั่งอยู่บนหลังมยุราชราชา
คือพญานกยูงคำตั๋วองอาจ เสด็จยัวรยาตรจักไปสู่เมษราศี
ก็ออกจากทิพยวิมานคำดีผ่องแผ้วด้วยประตู๋อันอยู่หนบูรพา คือ ทิศตะวันออก

แล้วยกย่างลีลาด้วยพหุพลนิกายโยธาไปสู่ทักษิณะทิศา คือ ทิศใต้ดั่งอั้น
ยามนั้นเป๋นเวลายามตูดเช้า เวลา ๐๗ นาฬิก๋า ๒๑ นาที บ่มีปล๋าย คนตังหลายจึ่งเรียกว่า
" วันสังขานต์ล่อง " ยามนั้นยังมีนางเทวดา ชื่อ รินทะหมอบ ต๋นรับเอา
ปี๋นี้สังขานต์ไปวันพุธ จักเดือดร้อนแก่ชาวเมือง วิวาทบาดหมางผิดเถียงกั๋น
จักร้อนใจ๋แก่เจ้าบ้านเจ้าเมือง พระราชามหากษัตริย์ คน บ้านเมือง จักเกิดศึกสงคราม
สรมชาวเจ้าจักเดือดร้อนใจ๋ ของใช้จักขึ้นราคา ของลายแดง และลูกไม้ผลไม้บ่สู้มีราคา

ปี๋นี้ฝนตกบ่เสมอหัวปี๋บ่มีมาก กล๋างปี๋และหล้าปี๋ก็จักมีนักพ่อง
ธารสดินดี ศุกร์ตกดิน คนจะอยู่ดีบ่มีโรคภัย แต่โจ๋รผู้ร้ายจะมาก น้ำอ้อยต้ำต๋าลจะแปง
คนเกิดวันศุกร์จะมีเคราะห์ใหญ่ คนเกิดวันเสาร์จักมีโชคลาภ
ในวันสังขานต์ไปนั้น จุ่งหื้อปากั๋นสระเกล้าดำหัวยังแม่น้ำ ทางไคว่ เก๊าไม้ใหญ่นอกบ้านชายคา
อว่ายหน้าไปสู่ทิสะหนใต้ แล้วเอาน้ำส้มป่อยดำหัว อาบองค์สรงเกศเกล้า ด้วยมนต์วิเศษ
สรูปเภทเป๋นคาถาว่า
สัพพะทุกขา สัพพะภะยา สัพพะอันตรายา สัพพะทุนนิมิตต๋า สัพพะคะหา สัพพะอุปัทวา วินาสันตุ

ปี๋นี้ศรีอยู่ปาก กาลกิณี อยู่ดัง (จมูก) จัญไร อยู่หลัง หื้อเอาส้มป่อยเช็ดขว้างเสีย
ปี๋นี้ผีหัวหลวงเป๋นยักษ์ อยู่ทิศหรดี (ทิศตะวันตกแจ่งใต้) ดำหัวอย่าบิ่นหน้าไปทางทิศนั้น
แล้วมานุ่งผ้าใหม่เหน็บดอกไม้ อันเป๋นดอกนามปี๋ ปี๋นี้ดอกดู่ (ประดู่) เป๋นพญาดอก
ควรเอามาเหน็บเกศเกล้ามวยผมและเหน็บไว้ ปากประตู๋บ้าน ประตู๋เรือน เป๋นมังคละ จักอยู่สุขะสวัสดีชะแล

ในเดือน ๘ ขึ้น ๒ ค่ำ พร่ำว่าได้เป๋นวันพฤหัสบดี ตรงกับวันที่ ๑๕ เมษายน ไทวันดับเม็ด
เป๋นวันปู๋ติ คือ วันเน่า ปี๋นี้เน่าวันเดียว อย่าไปทำมงคลในวันนี้ อย่าได้วิวาทผิดเถียงเดือดด่ากั๋น
หื้อได้ปากั๋นขนทรายเข้าวัด กวาดข่วงไม้สะหรี พระเจ๋ดีย์วิหาร จักได้พ้นเคราะห์กับต๋น
กับบ้านกับเมือง และ พระพุทธศาสนา

ในเดือน ๘ ขึ้น ๓ ค่ำ พร่ำว่าได้เป๋นวันศุกร์ ตรงกับวันที่ ๑๖ เมษายน ไทวัน รวายสัน
เป๋นวันพญาวัน พระสุริยะอาทิตย์เสด็จสถิตทิพยวิมานในเวลากาลได้ยามแตร จักใกล้เที่ยง
เวลา ๑๑ นาฬิก๋า ๑๘ นาที ๓๖ วินาที ยามนั้น จุลศักราชขึ้นแถม ๑ ตั๋ว เป๋นจุลศักราช ๑๓๗๒ ตั๋ว
ขาลฉนำ กัมโพธพิสัย ไทยล้านนาภาษาว่า ปี๋กดยี

หื้อได้พา กั๋นกระทำบุญหื้อทาน เจ๋ดีย์ทราย ช่อ ตุง ไม้ก๊ำสะหรี หื้อปากั๋นทำมังคละวัดวาอาราม
บ้านช่อง หอเรือน และบูชาสระสรง องค์พระพุทธรูปเจ้า มหาเจ๋ติยะพระธาตุ พระบฏ พระบาท
ไม้สรีมิ่งบ้าน และอารักษ์เจนเมือง มิ่งเมือง อย่าประมาทด้วย เหตุเคราะห์เมืองจักมี
แล้วหื้อป่กั๋นดำหัวครูบาสังฆะ พ่อเฒ่าแม่อุ้ย และ พ่อแม่ เพื่อขอเต๋ชะบารมีไว้กับต๋น
หื้อเป๋นมงคลตลอดปี๋ อยู่สุขสวัสดีมีโชคลาภ ลุหลั่งถั่งมาฮิมาก๊าขึ้น อยู่เย็นเป๋นสุขตลอด

ปี๋นี้เศษ ๔ ชื่ออสันนะวัสสะ งัว แม่ฮักสาปี๋ นกจอกฮักสาเดือน กระต่ายฮักสาป่า
นาคฮักสาน้ำ อินทสระเตวะบุตรฮักสาอากาศ ทักกรักขัสสะฮักสาแผ่นดิน

นักปราชญ์เป๋นใหญ่แก่คนตังหลาย เป็ดเป๋นใหญ่แก่ สัตว์ ๒ ตี๋น ควายเป๋นใหญ่แก่สัตว์ ๔ ตี๋น
ไม้ผักจิกเป็นใหญ่แก่ไม้ตังมวล ผีเสื้ออยู่ไม้หมากกวิด หนามเล็บแมวเป๋นใหญ่แก่ไม้จิ๋ง
ไม้ป้างเป๋นใหญ่แก่ไม้ก๋วง หญ้าคมบางเป๋นใหญ่กว่า หญ้าตังมวล ขวัญข้าวอยู่ไม้แสะ ข้าวกล้า
ถั่ว งา บ่ดี ข้าวจักลีบ คน เกิดปี๋นี้ เลี้ยงปันใหญ่ จักเป๋นดีมีสมบัติ ช่างดีด สี ตี เป่า
มีปัญญาลือชาปรากฎ อายุ ๘๐ ปี๋จักต๋าย

ปี๋นี้นาคหื้อน้ำ ๔ ตั๋ว บันดาลหื้อฝนตก ๗๐๐ ห่า ชื่อ ชีวาธิปิติ
ตกในมหาสมุทรและเขาสัตตบริภัณฑ์ ๓๓๗ ห่า
ตกในป่าหิมพานต์ ๒๓๑ ห่า ตกในมนุษย์โลก ๑๓๒ ห่า

ปี๋นี้เตวะดาวางเครื่องประดับหนบูรพา ปาปะลัคนาอยู่หนอาคะณย์ ปาปะเคราะห์อยู่หนพายัพ
ทิศะเหล่านี้เป๋นอัปมงคล บ่ดีไปค้าไปศึกทิศนั้น บ่ดีทำมงคลแก่บ้านเมืองในทิศนั้น
บ่ดีปกเสามงคลไปทิศนั้น จักเสียสรีเตชะ

อตีตวรพระพุทธศาสนาล่วงแล้วได้ ๒๕๕๒ พรรษาธิกาปลาย ๑๑ เดือน ๑๗ วัน
นับตั้งแต่พระยาวันคืนหลัง
อนาคตศาสนาอันจักมาภายหน้าค้างอยู่บ่หน้อยแถม ๒๔๔๗ พรรษาธิกาปลาย ๑ เดือน ๑๓ วัน
เหตุนับแต่วันปากปี๋ไป เอามาบวกกับกั๋นก็เต๋มห้าพันพระวสาถ้วน
บ่มีเศษเหตุต๋ามฎีก๋าที่ที่มหาพิลางคสัมมิหรสีเจ้าหากวิสัชนา แต่งแปลงสืบ ๆ
มาก็ปริปุณณาแล้วแล

พระครูอดุลสีลกิตติ์ สำนักวัดธาตุคำ ต.หายยา อ.เมือง จ.เชียงใหม่
เป๋นผู้ปล่านแปลงวิสัชนาแต่งแต้มทำนายพยากรณ์ตามคัมภีร์โหราศาสตร์เพทล้านนา
ฉบับวัดธาตุคำ

คลิกที่ภาพเพื่อชมภาพขนาดใหญ่